ಎನ್ ಚೆಂದ ಅದಿಯೇ ಗರತಿ....!

ತೊಟ್ಕೊಂಡಿ ಮುತ್ತಿನ ಮೂಗುತಿ
ಉಟ್ಕೊಂಡಿ ಇಳಕಲ್ ಸೀರಿ
ಆಗಿದಿ ನನ್ನೆದೆಯ ಒಡತಿ
ಕಾಡ್ತಿದಿ,  ಕನಸನ್ಯಾಗ ಬರತಿ

ಹಸಿರು ಬಳೆಗಳ ಸಪ್ಪಳ ಮಾಡತಿ
ಬೆಳ್ಳಿ ಗೆಜ್ಜೆಗಳ ನಾದ ಹೊರಡಿಸುತಿ
ಓರೆಗಣ್ಣೊಳಗ ಕಾಡೊಹಾಂಗ ನೋಡತಿ
ನೋಡೊ ನೋಟದಾಗ ನನ್ನ ಸುಡತಿ

ನಗುವಿನ ಒಡವಿ ಹಾಕ್ಕೊಂಡು
ನಾಚಿಕೆಯ ಅರಿವೆ ಹೊದ್ಕೊಂಡು
ಮಲ್ಲಿಗೆಯ ಮಾಲೆ ಮುಡ್ಕೊಂಡು
ಹೊಂಟಿದಿ ನನ್ನ ಮನಸು ಹೊಡ್ಕೊಂಡು
_ಪ್ರಕಾಶ್

ಮರಳಿ ಮರಳಿ ಕಾಡುತಿದೆ
ನೀ ಬಿಟ್ಟು ಹೋದ ನೆನಪು
ಕಣ್ಣಲಿ ಅಲುಗದೆ ಕುಳಿತಿದೆ
ನಿನದೆ ವಯ್ಯಾರ ಒನಪು

ತೋರುತಿದೆ ನನ್ನ ಹೃದಯ
ನನ್ನ ಮೇಲೆಯೆ ಮುನಿಸು
ಮರೆತಿದೆ ಮನವು ಖುಷಿಯ
ಕರಗಿದೆ ಒಲವ ಕನಸು

ಬಳಿ ಬಂದು ಒಮ್ಮೆ ತೋರೇ
ಈ ಮನಕೆ ಒಲವ ಸವಿಯ
ಮತ್ತೊಮ್ಮೆ ಪರಿಚಯಿಸು ಬಾರೇ
ಈ ಹೃದಯಕೆ ಖುಷಿಯ ರವಿಯ.
-ಪ್ರಕಾಶ್